‘மாநகரம்’, ‘கைதி’, ‘விக்ரம்’, ‘லியோ’, ‘கூலி’ போன்ற வெற்றி படங்களை இயக்கி முன்னணி இயக்குநராக திகழும் லோகேஷ் கனகராஜ், தற்போது கதாநாயகனாக புதிய அவதாரம் எடுத்துள்ளார். ‘ராக்கி’, ‘சாணி காயிதம்’, ‘கேப்டன் மில்லர்’ படங்களை இயக்கிய அருண் மாதேஸ்வரன் இயக்கியுள்ள இந்த திரைப்படத்திற்கு ‘DC’ என பெயரிடப்பட்டுள்ளது.
சன் பிக்சர்ஸ் தயாரிக்கும் இப்படத்தில் பாலிவுட் நடிகை வாமிகா கபி கதாநாயகியாக நடித்துள்ளார். அனிருத் ரவிச்சந்தர் இசையமைத்துள்ள இப்படத்தில் லோகேஷ் ‘தேவதாஸ்’ கதாபாத்திரத்திலும், வாமிகா ‘சந்திரா’வாகவும் நடித்துள்ளனர்.
ஏற்கனவே காதலர் தினத்தை முன்னிட்டு வெளியான ‘பிளடி வாலண்டைன்’ ப்ரோமோ ரசிகர்களிடம் கவனம் பெற்றிருந்த நிலையில், தற்போது வெளியாகியுள்ள டிரெய்லர் முழுக்க முழுக்க அதிரடி மற்றும் வன்முறை காட்சிகளால் நிரம்பியுள்ளது. அருண் மாதேஸ்வரனின் ஸ்டைலில் உருவாகியுள்ள இப்படம், ‘சாணி காயிதம்’ போலவே ரத்தம் தெறிக்கும் ஆக்ஷன் உலகத்தை காட்டுகிறது.
கடுமையான ஆக்ஷன், டார்க் விஷுவல்ஸ், அனிருத்தின் பின்னணி இசை ஆகியவை இணைந்து டிரெய்லருக்கு அதிக எதிர்பார்ப்பை ஏற்படுத்தியுள்ளன. “டிசி” திரைப்படம் விரைவில் திரைக்கு வரும் என டிரெய்லர் முடிவில் அறிவிக்கப்பட்டுள்ளது.