நயன்தாரா – கவின் இணைந்து நடிக்கும் “ஹாய்” திரைப்படம் வெளியீட்டுக்கு முன்பே ரசிகர்களிடையே பெரும் எதிர்பார்ப்பை ஏற்படுத்தியுள்ளது. அந்த எதிர்பார்ப்பை மேலும் உயர்த்தும் வகையில், இப்படத்தின் முதல் சிங்கிள் பாடல் தற்போது வெளியாகி சமூக வலைதளங்களில் வைரலாகி வருகிறது.
“கன்னக்குழியா புதைகுழியா குழப்புறயே” என்று தொடங்கும் இந்த மென்மையான காதல் மெலடி, இசையமைப்பாளர் ஜென் மார்டின் இசையில் உருவாகி, ஜிவி பிரகாஷின் இனிமையான குரலில் ரசிகர்களை கவர்கிறது. நீண்ட இடைவெளிக்குப் பிறகு மனதை வருடும் காதல் பாடலாக இது உருவாகியுள்ளதால், கேட்போரின் பிளேலிஸ்டில் இடம்பிடித்து வருகிறது.
பாடலின் காட்சியமைப்பும் ரசிகர்களின் பாராட்டைப் பெற்றுள்ளது. முதன்முறையாக இணையும் நயன்தாரா – கவின் ஜோடி, திரையில் அழகான ரசனைமிக்க கெமிஸ்ட்ரியை வெளிப்படுத்தியுள்ளனர். ஒவ்வொரு ஃப்ரேமும் காட்சியழகுடன் வடிவமைக்கப்பட்டுள்ளதால், பாடல் ஒரு முழுமையான காதல் அனுபவமாக மாறியுள்ளது.
Z ஸ்டூடியோஸ், தி ரவுடி பிக்சர்ஸ் மற்றும் 7 ஸ்க்ரீன் ஸ்டுடியோ ஆகிய நிறுவனங்கள் இணைந்து தயாரிக்கும் இந்த படத்தை, விஷ்ணு எடவன் எழுதி இயக்குகிறார். இயக்குனர் லோகேஷ் கனகராஜுடன் “கைதி”, “மாஸ்டர்”, “விக்ரம்” போன்ற படங்களில் பணியாற்றிய அனுபவம் கொண்ட அவர், இந்த படத்தின் மூலம் புதிய காதல் மற்றும் குடும்பக் கதையை ரசிகர்களுக்கு கொண்டு வருகிறார்.
மேலும், இப்படத்தில் கே. பாக்யராஜ், பிரபு, ராதிகா, சத்யன், ஆதித்யா கதிர், குரேஷி உள்ளிட்ட பலர் முக்கிய கதாபாத்திரங்களில் நடித்துள்ளனர்.
முழுக்க முழுக்க குடும்பம் சார்ந்த காதல் கதையாக உருவாகி வரும் “ஹாய்” படம், முதல் சிங்கிள் மூலம் ரசிகர்களின் மனதை கவர்ந்துள்ள நிலையில், அடுத்தடுத்த அப்டேட்கள் மீதான எதிர்பார்ப்பு மேலும் அதிகரித்துள்ளது. ஜென் மார்டின் இசை, விஷ்ணு எடவனின் கதை சொல்லும் முறை, நயன்தாரா – கவின் கூட்டணி ஆகியவை இணைந்து, இந்த படத்தை ஒரு உணர்ச்சி மிக்க காதல் அனுபவமாக மாற்றும் என ரசிகர்கள் நம்பிக்கையுடன் காத்திருக்கின்றனர்.