தொழிலதிபரும் கண்டுபிடிப்பாளருமான ஜி.டி. நாயுடுவின் வாழ்க்கையை மையமாகக் கொண்டு உருவாகியுள்ள ‘G.D.N’ திரைப்படத்தின் விளம்பர நிகழ்ச்சியில், இயக்குநர் கே.எஸ். ரவிகுமார் மற்றும் நடிகர் மாதவன் இணைந்து சிறப்பு நேர்காணலில் பங்கேற்றனர். அப்போது நடிகர் விஜய், தமிழக அரசியல் மற்றும் தனது அரசியல் நிலைப்பாடு குறித்து மாதவன் வெளிப்படையாகப் பேசினார்.
தமிழகத்தின் அரசியல் சூழல் குறித்து கருத்து தெரிவித்த மாதவன், “தமிழகத்தில் அரசியல் இவ்வளவு வேகமாக மாறும் என்பதை யாரும் எதிர்பார்க்கவில்லை. அந்த மாற்றம் மக்களுக்கு புதிய நம்பிக்கையை ஏற்படுத்தியுள்ளது. எனக்கு விஜய்யை நன்றாகத் தெரியும். என் நண்பர் விஜய் இன்று முதலமைச்சராக இருப்பது எனக்கு பெருமையாக இருக்கிறது” என்றார்.
அரசியலில் களமிறங்கும் எண்ணம் குறித்து கேட்கப்பட்டபோது, “எனக்கு அரசியலுக்கு வர வேண்டும் என்ற விருப்பமே இல்லை. மக்களுக்குச் சேவை செய்ய அதிகாரம் அவசியமில்லை. அதிகார ஆசையும் எனக்குக் கிடையாது. தலைவராகவோ, முதலமைச்சராகவோ ஆக வேண்டும் என்ற லட்சியம் இல்லை. அந்த வகையில் நான் ஒரு சுயநலவாதி” என்று சிரித்தபடி பதிலளித்தார்.
மேலும், “அரசியல் குறித்து எனக்கு பெரிய புரிதல் இல்லை. மக்களால் தேர்ந்தெடுக்கப்பட்ட பிரதிநிதிகளை நான் மதிக்கிறேன். என் ‘தம்பி’ படத்தில் வரும் வசனம்போல, யாருக்கும் தீங்கு விளைவிக்காமல் என் வேலையைச் சரியாகச் செய்வதே எனது நம்பிக்கை” என்றும் கூறினார்.
இதனைத் தொடர்ந்து பேசிய இயக்குநர் கே.எஸ். ரவிகுமார், “அரசியல் என்பது இருமுனை கத்தி போன்றது. நல்லது செய்தாலும் விமர்சனம் வரும்; தவறு செய்தாலும் விமர்சனம் வரும். நீங்கள் என்ன செய்தாலும் அதை எதிர்மறையாகப் பார்க்கும் ஒரு தரப்பு எப்போதும் இருக்கும்” என்று தனது கருத்தை பகிர்ந்தார்.
துணை முதலமைச்சர் உதயநிதி ஸ்டாலினின் மகன் இன்பன் உதயநிதி குறித்து பேசிய அவர், “நான்கு வயதில் என் மடியில் அமர்ந்திருந்த இன்பன் இன்று வளர்ந்து நிற்பதைப் பார்க்கும் போது மிகவும் மகிழ்ச்சியாக இருக்கிறது” என்றார்.
“இந்தியாவின் எடிசன்” என்று போற்றப்படும் கோவை தொழிலதிபர் மற்றும் கண்டுபிடிப்பாளர் ஜி.டி. நாயுடு வாழ்க்கையை அடிப்படையாகக் கொண்டு உருவாகியுள்ள ‘G.D.N’ திரைப்படத்தை கிருஷ்ணகுமார் ராமகுமார் இயக்கியுள்ளார். இதில் மாதவனுடன் சத்யராஜ், பிரியாமணி, ஜெயராம் மற்றும் துஷாரா விஜயன் ஆகியோர் முக்கிய கதாபாத்திரங்களில் நடித்துள்ளனர்.