நடிகர் விஷாலின் 35-வது திரைப்படமாக உருவாகியுள்ள ‘மகுடம்’ படத்தின் அடுத்த பாடல் இன்று மாலை வெளியாக உள்ளது.
‘மகுடம்’ படத்திற்கு ஜி.வி. பிரகாஷ் குமார் இசையமைத்துள்ளார். சூப்பர் குட் பிலிம்ஸ் சார்பில் ஆர்.பி. சௌத்ரி தயாரித்துள்ள இப்படம், அந்நிறுவனத்தின் 99-வது தயாரிப்பாகும். துஷாரா விஜயன் கதாநாயகியாக நடிக்க, அஞ்சலி முக்கிய கதாபாத்திரத்தில் நடித்துள்ளார்.
மூன்று விதமான கதாபாத்திரங்களில் விஷால் நடித்துள்ள இப்படத்தின் கதை கப்பல் மற்றும் துறைமுகத்தை மையமாகக் கொண்டு உருவாகியுள்ளதாக கூறப்படுகிறது. இப்படத்தை முதலில் ‘ஈட்டி’, ‘ஐங்கரன்’ படங்களை இயக்கிய ரவி அரசு இயக்குவதாக அறிவிக்கப்பட்டிருந்தது. பின்னர் அவர் படத்தில் இருந்து விலகிய நிலையில், விஷாலே இப்படத்தை இயக்கி நடித்துள்ளார்.
கடந்த ஆண்டு ஜூலை மாதம் தொடங்கிய ‘மகுடம்’ படத்தின் படப்பிடிப்பு, இந்த ஆண்டு ஜூன் மாதம் நிறைவடைந்தது. இதனைத் தொடர்ந்து படத்தின் போஸ்டர், டீசர் மற்றும் பாடல்கள் வெளியாகி ரசிகர்களிடம் கவனம் பெற்றன.
இந்நிலையில், ‘மகுடம்’ படத்தின் புதிய பாடலான ‘கலங்காதே’ இன்று மாலை 6 மணிக்கு வெளியாகும் என படக்குழு அறிவித்துள்ளது. இதற்கான ப்ரோமோ வீடியோவும் இணையத்தில் வெளியாகி வைரலாகி வருகிறது.
மேலும், ‘மகுடம்’ திரைப்படம் அடுத்த மாதம் 14-ம் தேதி திரையரங்குகளில் வெளியாகும் எனவும் அறிவிக்கப்பட்டுள்ளது. இதனால் விஷால் ரசிகர்கள் மத்தியில் படத்தின் மீதான எதிர்பார்ப்பு அதிகரித்துள்ளது.