வதந்திகளுக்கு முற்றுப்புள்ளி: நடிகை ஜியா சங்கருக்கு நிச்சயதார்த்தம்!

‘காதல் ரீசெட் ரிப்பீட்’ மற்றும் மராத்தி திரைப்படமான ‘வேத்’ மூலம் ரசிகர்களிடையே பிரபலமான நடிகை ஜியா சங்கர், தனது நிச்சயதார்த்தத்தை அதிகாரப்பூர்வமாக அறிவித்து ரசிகர்களுக்கு இன்ப அதிர்ச்சி அளித்துள்ளார்.

நீண்ட நாட்களாக ரகசியமாக இருந்த அவரது காதலர், அமெரிக்காவைச் சேர்ந்த தொழிலதிபர் கரண் தனக் என்பது தற்போது உறுதியாகியுள்ளது. நீண்ட தூரக் காதலாக மலர்ந்த இவர்களின் உறவு, கடல் பின்னணியில் அமைந்த அழகிய பூங்காவில் நடைபெற்ற ரொமான்டிக் புரொபோசலுடன் நிச்சயதார்த்தமாக மாறியுள்ளது.

கரண் மோதிரம் அணிவித்து காதலை வெளிப்படுத்திய அந்த நெகிழ்ச்சியான தருணத்தில், உணர்ச்சிவசப்பட்ட ஜியா சங்கர் ஆனந்தக் கண்ணீர் விட்டதாக கூறப்படுகிறது. அந்த மறக்க முடியாத தருணங்களின் புகைப்படங்களை அவர் தனது சமூக வலைதளங்களில் பகிர்ந்துள்ளார்.

நிச்சயதார்த்த அறிவிப்புடன் ஜியா பகிர்ந்த உருக்கமான பதிவில், “நாம் எதிர்பார்க்காத நேரத்தில்தான் காதல் நம்மைத் தேடி வருகிறது. ஆயிரக்கணக்கான மைல்கள் தொலைவில் இருந்தாலும், உன்னுடன் பேசிய ஒவ்வொரு தருணமும் எனக்கு வீட்டில் இருப்பது போன்ற உணர்வைத் தந்தது. இந்தப் பயணம் எளிதாக இருக்கவில்லை. ஆனால் ஒவ்வொரு நாளும் நாம் ஒருவரையொருவர் தேர்ந்தெடுத்தோம். என் வாழ்க்கையில் நான் எதிர்பார்த்த அன்பை நீ எனக்குக் கொடுத்தாய். உலகின் எந்த மூலையில் இருந்தாலும், ‘வீடு’ என்பது ஒரு இடம் அல்ல… அது நீதான். உன்னுடன் என் வாழ்நாள் முழுவதையும் கழிக்க ஆவலாக இருக்கிறேன். நான் உன்னை நேசிக்கிறேன், கரண்,” என்று தனது காதலை வெளிப்படுத்தியுள்ளார்.

இந்த நிச்சயதார்த்த அறிவிப்பின் மூலம் ஜியா சங்கர் குறித்து பரவி வந்த காதல் வதந்திகளுக்கு முற்றுப்புள்ளி வைக்கப்பட்டுள்ளது.