‘சார்பட்டா 2’ ஆகஸ்டில் ஆரம்பம்! ‘வேட்டுவன்’ முடிந்ததும் களத்தில் ஆர்யா!

நடிகர் ஆர்யாவுக்கு 2021 ஆம் ஆண்டு ஒரு பொற்காலமாக அமைந்தது. ‘டெடி’, ‘சார்பட்டா பரம்பரை’, ‘அரண்மனை 3’ என ஹாட்ரிக் வெற்றிகளை அவர் குவித்தார். குறிப்பாக பா.ரஞ்சித் இயக்கத்தில் 80களின் பின்னணியில் வெளியான ‘சார்பட்டா பரம்பரை’ திரைப்படம் விமர்சன ரீதியாகவும் வசூல் ரீதியாகவும் பெரும் வரவேற்பைப் பெற்றது. ஆனால், அந்த வெற்றிக்குப் பிறகு ஆர்யா நடித்த படங்கள் அந்த அளவிற்கு கைகொடுக்கவில்லை. அதேபோல், இயக்குனர் பா.ரஞ்சித்தும் ‘நட்சத்திரங்கள் நகர்கிறது’ மற்றும் பெரிதும் எதிர்பார்க்கப்பட்ட ‘தங்கலான்’ ஆகிய படங்களை இயக்கியிருந்தாலும், ‘தங்கலான்’ எதிர்பார்த்த வெற்றியைப் பெறவில்லை என்ற கருத்தும் நிலவுகிறது.

இந்நிலையில், ‘சார்பட்டா பரம்பரை’ படத்தின் இரண்டாம் பாகம் உருவாகும் என்று ஆர்யாவும், பா.ரஞ்சித்தும் ஏற்கனவே தெரிவித்திருந்தனர். தற்போது நடிகர் சந்தானம் தயாரித்து நடித்துள்ள ‘டிடி நெக்ஸ்ட் லெவல்’ படத்தின் வெளியீட்டு விழாவில் கலந்து கொண்ட ஆர்யா, ‘சார்பட்டா பரம்பரை 2’ படத்தின் படப்பிடிப்பு எப்போது தொடங்கும் என்பது குறித்து முக்கிய தகவலை வெளியிட்டார்.

அவர் கூறுகையில், “நான் தற்போது ‘வேட்டுவன்’ என்ற படத்தில் நடித்து வருகிறேன். இந்த படத்தின் படப்பிடிப்பு விரைவில் முடிவடையும். அதனைத் தொடர்ந்து, ‘சார்பட்டா பரம்பரை 2’ படத்தின் படப்பிடிப்பு வரும் ஆகஸ்ட் மாதம் தொடங்க திட்டமிடப்பட்டுள்ளது” என்று தெரிவித்தார். ஆர்யாவின் இந்த அறிவிப்பு அவரது ரசிகர்கள் மத்தியில் பெரும் உற்சாகத்தை ஏற்படுத்தியுள்ளது. மீண்டும் பா.ரஞ்சித் இயக்கத்தில் ஆர்யா களமிறங்கவுள்ள ‘சார்பட்டா பரம்பரை 2’ படத்தின் மீதான எதிர்பார்ப்பு இப்போதே அதிகரித்துள்ளது. ‘வேட்டுவன்’ படத்தை முடித்துவிட்டு ஆர்யா மீண்டும் பாக்ஸிங் களத்தில் சாதிப்பாரா என்பதை பொறுத்திருந்து பார்ப்போம்.