சாருகேசி திரைப்பட விமர்சனம்

புகழ்பெற்ற கர்நாடக சங்கீதக் கலைஞராக வாழும் சாருகேசி (ஒய்.ஜி. மகேந்திரா), இசையையும் தனது மனைவி பத்மா (சுஹாசினி)வையும் தனது வாழ்க்கையின் இரண்டு கண்களாக கருதுகிறார். இசை உலகில் உச்சத்தை தொட்டிருந்தாலும், அவரது தனிப்பட்ட வாழ்க்கை ஆழமான வேதனைகளால் நிரம்பியுள்ளது. அதற்கு காரணம் அவரது ஒரே மகன் ராஜ் ஐயப்பன்.

தந்தையின் புகழின் நிழலில் வாழ விரும்பாத மகன், தனக்கென ஒரு அடையாளத்தை உருவாக்க முயற்சிப்பதோடு, தந்தையிடமிருந்து விலகி வாழ்கிறார். மேலும், தனது காதலியான ரம்யா பாண்டியனை பெற்றோருக்குத் தெரியாமல் திருமணம் செய்து கொள்கிறார்.

இந்த திருமணத்தை மனதார ஏற்றுக் கொள்ளும் சாருகேசி – பத்மா தம்பதிக்கு, எதிர்பாராத அதிர்ச்சியை அளிக்கிறார் ரம்யா பாண்டியன். அவர்களுக்கு மட்டுமே தெரிந்த ஒரு ரகசியத்தை ஆயுதமாக பயன்படுத்தி, பழிவாங்கும் தனது நோக்கத்தை வெளிப்படுத்துகிறார்.

ஏற்கனவே மகனால் ஏற்பட்ட மனவேதனையுடன் வாழும் சாருகேசி, இந்த புதிய சோதனையை எப்படி எதிர்கொள்கிறார்? அந்த ரகசியம் என்ன? அவரது வாழ்க்கை எப்படிப் பயணிக்கிறது? என்பதையே குடும்ப உறவுகள், நம்பிக்கை மற்றும் வாழ்க்கை தத்துவத்துடன் இணைத்து சொல்கிறது ‘சாருகேசி’.

நடிப்பு

சாருகேசி கதாபாத்திரத்தில் நடித்துள்ள ஒய்.ஜி. மகேந்திரா, அனுபவமிக்க நடிகராக தனது திறமையை முழுமையாக வெளிப்படுத்தியுள்ளார். இசை உலகின் உச்சத்தை தொட்ட கலைஞராகவும், மகனால் புறக்கணிக்கப்படும் தந்தையாகவும் இரு பரிமாணங்களையும் சிறப்பாக வெளிப்படுத்துகிறார்.

சுஹாசினி, சாருகேசியின் மனைவியாக அமைதியான மற்றும் முதிர்ச்சியான நடிப்பை வழங்கியுள்ளார். சில காட்சிகளில் நாடகத் தன்மை தெரிந்தாலும், அவரது திரை இருப்பு படத்திற்கு பலமாக அமைகிறது.

ராஜ் ஐயப்பன் மற்றும் ரம்யா பாண்டியன், இளைய தலைமுறையின் மனநிலையை பிரதிபலிக்கும் வகையில் இயல்பாக நடித்துள்ளனர். அவர்களின் கதாபாத்திரங்கள் மீது பார்வையாளர்களுக்கு கோபமும், அதே நேரத்தில் ஆர்வமும் ஏற்படும் வகையில் வடிவமைக்கப்பட்டுள்ளன.

சத்யராஜ், சமுத்திரக்கனி, தலைவாசல் விஜய், தீனா ரித்விக், ப்ரீதிகா உள்ளிட்டோர் தங்களது பங்களிப்பின் மூலம் கதையை மேலும் வலுப்படுத்தியுள்ளனர்.

தொழில்நுட்பம்

ஒளிப்பதிவாளர் சஞ்சய்.பி.எல், காட்சிகளை எளிமையாக பதிவு செய்துள்ளார். படத்தின் பெரும்பாலான காட்சிகள் வசனங்களையே மையமாகக் கொண்டிருப்பதால், காட்சியமைப்பில் பெரிய பரிசோதனைகள் எதுவும் செய்யப்படவில்லை.

இசையமைப்பாளர் தேவா, தனது வழக்கமான பாணியிலிருந்து விலகி கர்நாடக சங்கீதம் சார்ந்த இசையமைப்பில் கவனம் செலுத்தியுள்ளார். மெலோடி பாடல்கள் மனதில் நிற்கும் வகையில் அமைந்துள்ளன. பின்னணி இசையும் கதையின் உணர்வுகளுக்கு ஏற்றபடி பயணிக்கிறது.

ரிச்சர்ட் மேற்கொண்ட படத்தொகுப்பு, ஒரு மனிதனின் வாழ்க்கைச் சரித்திரத்தை வாசிப்பது போன்ற உணர்வை ஏற்படுத்துகிறது.

இயக்கம்

பா. விஜய் எழுதிய வசனங்கள் மற்றும் பாடல்கள் படத்தின் முக்கிய பலமாக இருக்கின்றன. அதே நேரத்தில் சில தத்துவ வசனங்களும், ஊக்கமளிக்கும் கருத்துகளும் பழக்கப்பட்டதாக தோன்றுவது சிறிய குறையாக அமைகிறது.

கதை ஆசிரியர் வெங்கட், ஒரு இசைக் கலைஞரின் வாழ்க்கைப் போராட்டத்தை நேர்மையாக அணுகியுள்ளார். இயக்குநர் சுரேஷ் கிருஷ்ணா, மேடை நாடகத்தின் ஆன்மாவை காக்கும் வகையில் திரைப்படத்தை உருவாக்கியிருக்கிறார். தேவையற்ற சினிமாத்தனங்களை தவிர்த்து, மனித உணர்வுகளையும் வாழ்க்கை பாடங்களையும் மையப்படுத்தியிருப்பது படத்தின் சிறப்பாகும்.

தீர்ப்பு

இசை, குடும்ப உறவுகள், துரோகம், மன்னிப்பு மற்றும் வாழ்க்கை தத்துவம் ஆகியவற்றை மையமாகக் கொண்டு உருவாகியுள்ள ‘சாருகேசி’, மெதுவாக நகர்ந்தாலும் மனதைத் தொடும் ஒரு உணர்வுப்பூர்வமான படைப்பு.

மொத்தத்தில், ‘சாருகேசி’ – அதன் பெயரைப் போலவே மனதை வருடும் ஒரு ராகம்.