மலைவாழ் பெண்ணாக அபர்ணதி

கணேஷ் விநாயகன் இயக்கத்தில் தருண் குமார், அபர்ணதி நடித்த தேன் படம் பல்வேறு திரைப்பட விழாக்களில் கலந்துகொண்டு பாராட்டுகளையும் விருதுகளையும் பெற்றுள்ளது. இந்த படத்தின் வினியோக உரிமையை பிரபல தயாரிப்பாளரான டிரைடண்ட் ஆர்ட்ஸ் ரவீந்திரன் கைப்பற்றி அடுத்த ஆண்டு வெளியிடுகிறார்.

படம் பற்றி இயக்குனர் கூறியதாவது, ’தேனி மாவட்டம் குரங்கணி மலைப்பகுதியில் பெரும்பாலான படப்பிடிப்பு நடந்தது. கதாநாயகனின் தொழில் தேன் எடுப்பது. சில தடைகளை மீறி அவர் கதாநாயகியை திருமணம் செய்கிறார். அதன் பிறகு அவர்கள் வாழ்க்கை எப்படி மாறியது என்பதை உணர்வுபூர்வமாக கூறியிருக்கிறோம்.

ஆர்யாவின் எங்க வீட்டு மாப்பிள்ளை நிகழ்ச்சி மூலமாக பிரபலமான அபர்ணதி மலைவாழ் பெண்ணாக நடித்துள்ளார். நம் நாட்டில் நடந்த உண்மை சம்பவம் ஒன்றின் அடிப்படையில் இந்த கதை உருவாக்கப்பட்டுள்ளது. மைனா படத்துக்கு ஒளிப்பதிவு செய்த சுகுமார் ஒளிப்பதிவு செய்துள்ளார். இவ்வாறு அவர் கூறினார்.