விஸ்வாசம் படத்திற்காக தேசிய விருது… அஜித், விஜய், ரஜினி என்ன சொன்னார்கள்? – டி.இமான் பகிர்வு

கடந்த 2019-ம் ஆண்டுக்கான 67-வது தேசிய திரைப்பட விருதுகள் கடந்த திங்களன்று அறிவிக்கப்பட்டன. இதில் தேசிய விருதை வென்று, தமிழ் சினிமாவிற்கு பெருமை சேர்த்தவர்களில் இசையமைப்பாளர் டி.இமானும் ஒருவர்.

நடிகர் அஜித் நடித்த விஸ்வாசம் படத்தில் இடம்பெற்ற சிறப்பான பாடல்களுக்காக அவருக்கு தேசிய விருது அறிவிக்கப்பட்டுள்ளது. அப்படத்தில் ‘கண்ணான கண்ணே’, ‘வானே’, ‘அடிச்சி தூக்கு’ போன்ற சூப்பர்ஹிட் பாடல்கள் இடம் பெற்றிருந்தன. தேசிய விருது அறிவிக்கப்பட்டதைத் தொடர்ந்து, டி.இமானுக்கு அவரது ரசிகர்களும், பிரபலங்களும் சமூக வலைதளங்கள் வாயிலாக வாழ்த்து தெரிவித்து வருகின்றனர்.

இந்நிலையில், தனக்கு தமிழ் சினிமாவின் உச்ச நட்சத்திரங்களான ரஜினிகாந்த், அஜித், விஜய் ஆகியோர் வாழ்த்து தெரிவித்ததாக டி.இமான் டுவிட்டரில் பதிவிட்டுள்ளார். மேலும் தன்னுடைய இசைப் பயணம் விஜய்யின் தமிழன் படம் மூலம் தான் தொடங்கியதாக தெரிவித்துள்ள இமான். தற்போது விஸ்வாசம் படத்திற்காக தேசிய விருது வென்றதற்கு, விஜய் வாழ்த்தியது நெகிழ்ச்சியாக இருந்ததாக குறிப்பிட்டுள்ளார்.